【幸福路上不只婚姻,學會欣賞單身的美麗】 | Girl Power | 小月巴

pixta_23941

直到今日,女人單身仍然係一種罪。

男人事業略有小成,三、四十歲未結婚都被封為「筍盤」,相反女人專注事業就被叫作「剩女」,禮貌一點「盛女」稱呼,依然表示未婚女人生活再充實豐盛,都係甩唔到「賣剩」既標籤。

問十個人幸福既定義,會有十個唔一樣既答案。有人從小以擁有自己既家庭為目標,例如日本女星堀北真希,結婚生子後引退,對佢來講「守護家庭」先係人生目標;亦有人視事業先係人生最高既追求,愛情隨緣就好。

美滿既婚姻可以為人生錦上添花,但絕對唔應該係生命唯一。可笑既係,呢個枷鎖好多時候都係由女人為彼此戴上。

上一輩認為女人要搵到好歸宿,於是緊張你既婚姻大事;一年見一兩次既親戚,帶住一半好奇一半關心,話題都圍繞住子姪輩的感情狀況。就連身邊朋友同事,到左適婚年齡,一個個輪流派喜帖,被連環既「紅色炸彈」炸到頭昏腦脹,因為自己未有另一半而失落。

女人之間既話題離不開愛情,互相關心大家既感情狀況,當身邊有伴侶既朋友數量變多,單身既幾個就特別受關注,即使欣賞你對事業既付出,但仍然加倍鼓勵你趁年輕要快去搵男朋友,出於希望朋友幸福既說話有時會造成太大壓力,未必人人適用。

三十歲係女人綻放美麗既時刻,唔代表年過三十就開始「掉價」。自己既幸福要由自己去定義。如果你認為單身/不婚比較開心,就應該繼續享受呢種自由,唔需要因為外界既「好意」強迫自己去speed dating,趕在成為高齡產婦前步入婚姻殿堂。

我地或者改變唔到長者既想法,至少可以由自己開始,堅持去追求各自理想中既幸福,亦要停止向朋友、後輩不自覺的灌輸「幸福=婚姻」既想法。或者十年之後,「單身女人」可以成為擺脫負面既意義。

我要留言